[電話儲值卡實名制] 太空卡實名登記分享
俗稱「電話卡實名制」嘅《電訊（登記用戶識別卡）規例》於2021年9月1日正式生效, 落實電話智能卡（SIM卡）要實名登記! 根據規例, 現行電話儲值卡 (即係太空卡) 嘅用戶必須於今年2月23日或之前完成實名登記, 否則太空卡將會於2月24日被停用. 一向有拖延症嘅我其實手上都有一張太空卡, 拖咗幾個月一路都懶得搞, 直到近排見到電視新聞都開始積極宣傳又臨近死線, 先乖乖上網搵下點樣搞, 順便寫埋呢篇分享~ Step 1: 了解自己張儲值卡係屬於邊間電訊商/電話儲值卡品牌 由於呢個實名登記係直接向電話卡所屬嘅電訊商進行登記的 (我之前曾經傻傻的以為係去政府某個網站登記), 而每個電訊商都有自己嘅電話儲值卡實名登記網頁連結, 所以第一步要先搞清楚自己張太空卡係屬於邊間電訊商又或者係邊個品牌~ 如果唔記得咗, 大家可以搵返電話卡個包裝望望, 萬一已經遺失咗或者一早掉咗, 亦可以喺裝太空卡嗰部電話睇返過往嘅短訊SMS, 相信一定搵到邊間電訊商發比你嘅!就以我為例, 我本身都唔記得咗用緊咩卡, 喺我懊惱緊嘅時候, 就喺SMS紀錄入面搵得返當初啟用張儲值卡嗰陣由電訊商SEND嚟嘅訊息~ 係講關於儲值卡嘅電話號碼, 有效期, 餘額同數據/分鐘用量嘅~ Step 2: 準備登記所需文件 個人用戶: 1) 有效及須登記的儲值卡 （預先插入電話裝置內） 2) 香港身份證/其他身份證明文件 3)…