近來睡眠質素欠佳, 每晚都訓得好差, 有時一晚醒幾次, 有時甚至失眠, 明明好攰但點訓都訓唔著, 眼光光飲豬肉湯..導致每日訓醒都仲係好冇精神, 訓完等於冇訓咁, 簡直身心疲累! 之後有次上網買嘢時見到做緊泰國足貼嘅特價, 產品聲稱功效多多, 除了可以提升睡眠質量, 祛濕排毒, 消除疲勞, 改善腸胃, 更能改善肩頸痛和腰酸背痛, 預防由濕氣引起的痛症. 莫非我係因為濕氣重影響訓覺質素? 見佢講到咁神奇, 價錢唔使一蚊一塊, 就即管試下可唔可以幫到我啦!
呢類型嘅足貼其實都推出咗好多年, 市面上品牌林林總總, 但一直都無咩特別留意, 今次隨意揀咗呢款足貼嘅成分有黑姜, 竹炭, 竹醋 (竹酢), 薑黃根粉, 艾葉, 桔梗, 電氣石等等. 收到貨當晚立即試下, 根據指示臨訓前貼在腳底心, 對準腳底凹陷位置貼好, 貼咗八小時後睡醒就撕走, 見到成塊足貼都變黑變濕咗, 唔知係心理作用定係塊足貼真係咁有效, 訓醒覺得好似真係比平時冇咁攰, 半夜都冇乜醒過! 於是一向求知慾強嘅我就上網研究一下究竟足貼吸走濕氣係用咩原理呢!
足貼變黑真相
坊間一般認為足貼變黑變濕就表示身體內嘅濕氣和毒素被排出來了,一搵之下, 先發現原來係因為足貼中嘅部分成份 (例如木酢) 遇到水或者溫度變化就會產生化學作用而變黑, 換言之變黑現象只係因為吸收咗腳底嘅汗水, 特別係足貼內嘅竹炭有發熱功能, 貼足一晚就當然會出更多汗啦! 咁即係見到足貼變黑根本唔等於有效吸走體內濕毒, 難道呢類產品都是欺騙消費者?!
拆解足貼祛濕原理
雖然知道咗足貼出現變黑事實上係因為足貼中的木酢成分等遇水變黑所造成, 但好彩並唔代表足貼一定無排濕嘅功效㗎! 原來足貼祛濕原理係利用中醫裡「貼敷法」概念, 令具有排水排濕作用的藥材能透過肌膚吸收, 通過腳底嘅穴位經絡, 影響到體內和濕氣有密切關係的脾臟與腎臟, 從而促進新陳代謝和血液循環來幫助排除體內過多的濕氣. 因此, 只要足貼成分包含活血化瘀類 (例如紅花)、解表類 (例如生薑)、溫熱類 (例如艾葉) 嘅藥材, 理論上都係有助排除濕氣消水腫的. 而足貼常見嘅其中一個成分-電氣石有釋放負離子及遠紅外線的特質, 與促進血液循環亦可能有關聯.
至於點解足貼要貼於腳底, 就係因為腳底有眾多穴位及經絡, 尤其腎經是唯一一條經過腳底的經絡, 腳底的穴位和經絡都對應人體的許多臟腑器官, 而最重要嘅穴位就係位於腳底正中偏上一點的「湧泉穴」. 湧泉穴為腎之精氣起始位置, 是腎經的要穴, 所以要調理脾腎經絡的氣血, 祛濕氣消水腫, 把包含藥材成分的足貼貼於腳底, 刺激腳底的湧泉穴, 便能達致温腎助陽、温經活血、行水化濕通絡等作用.
