香港通漲升溫, 百物騰貴, 連中電和港燈都話要加電費, 我哋呢啲小市民為咗保住個荷包真係要搵方法慳電費先得! 家居要慳電, 首先要搵出屋企入面最嘥電嘅幾樣電器! 大家第一時間應該都會諗起其中一樣必定係夏天嘅恩物”冷氣機”吧! 下面我就從搜集到嘅資料入面歸納咗幾個冷氣機嘅慳電方法, 同大家分享下:
1. 能源標籤
首先選購冷氣機時, 我哋要揀啲貼有「一級」能源標籤嘅冷氣機, 代表能源效益最高, 不過通常市面上電器舖賣嘅大部份都係一級能源效益嘅型號㗎喇, 咁我哋就可以睇埋能源標籤上面嘅第二欄「每年耗電量」去比較唔同型號可以慳幾多電費.
2. 要選用變頻式冷氣機
所謂 「變頻式」 即係可以隨著室內溫度變化而自動調整輸出功率. 消委會曾經喺報告中指出, 變頻式冷 氣比傳統定頻式冷氣機, 每年可以節省高達四成耗電量. 傳統定頻式冷氣機達到設定室溫後, 會停止運轉, 而變頻式冷氣機則會自動切換成低頻模式, 繼續運作, 因此可以大大慳電.
3. 好好保養冷氣機
為咗錫住個荷包, 我哋真係唔好懶, 要定期清洗冷氣機隔塵網, 用舊牙刷輕擦入風口及出風口, 咁就可以保持出風流暢, 避免有污糟嘢影響冷氣機嘅效能, 而且仲可以減少過敏情況以及令冷氣嘅製冷效率更加好. 如果冷氣機已經用咗一段日子, 可以搵師傅用專業清洗劑將冷氣機徹底清洗乾淨.
另外, 有時我哋開冷氣時會聞到一陣霉味, 為咗防止冷氣機內部有霉菌滋生, 每年入秋停用冷氣機前, 先將冷氣機調至送風/風扇(fan)模式運行4小時去確保機內零件已經乾透, 咁出年再開冷氣嗰陣, 部冷氣機就更能保持最佳狀態.
4. 留意冷氣機安裝位置
我哋要避免將冷氣機安裝喺有陽光直接照射嘅地方. 當有日光照射, 機身同周圍嘅溫度上升, 冷氣散熱效率就會降低, 耗電量會大大增加約16.5%. 若果無可避免要安裝喺呢啲位置, 亦可以考慮在冷氣機上面安裝遮陽篷, 保護冷氣機不受太陽直射, 同時仲可以避免冷氣機長年被雨水淋濕, 幫助延長冷氣機壽命.
5. 我哋仲可以喺日常使用方法上面著手! 以下綜合咗一啲冷氣使用小貼士:
- 在日照時間拉上窗簾, 目的係阻擋陽光照射入室內, 減少室內嘅熱能. 當回家開冷氣時, 就能夠喺較低溫度下開始制冷, 減輕冷氣機要溫度下降到指定水平時嘅負荷, 從而達到慳電效果. 同樣道理, 開咗冷氣後要保持門窗緊閉並拉上窗簾遮擋陽光以保持室內溫度, 亦可關掉室內不必要嘅燈飾和發熱電器以減低冷氣負荷.
- 風扇嘅耗電量遠低於冷氣機, 只要將冷氣機配合風扇(特別係循環風扇) 同時使用, 加快空氣流動, 令整個空間會涼得更快, 咁就可以將冷氣機嘅溫度調高 2-3 度來節省電力 (例如將冷氣溫度設定喺26～28度之間). 如果冷氣溫度校得太低, 一來會影響身體健康, 二來冷氣嘅壓縮機需要長期高度運轉以致消耗更多電力, 仲會影響壓縮機壽命, 令到部冷氣機會冇咁耐用! 因此加開一部風扇輔助送風, 溫度會比較舒適之餘仲能夠有效地慳電慳錢. 至於風扇放嘅位置, 將風扇放喺冷氣機對面, 或者將冷氣機與風扇出風方向擺放成 “L” 形, 會更加有效節省電力.
- 訓覺前應該將冷氣機溫度調高, 有啲人會怕自己半夜熱醒所以會專登喺訓覺前調低冷氣溫度, 但其實當我哋熟睡之後, 人體溫度會稍為下降, 所以將冷氣溫度調高一點反而剛剛好. 要知道冷氣溫度每調高一度就可以慳大約6%-10%電力, 咁變相又可以慳返唔少電費! 另外, 如果冷氣機設有時間掣, 更可以善用時間掣功能, 預設喺起身前一小時前熄冷氣, 因為喺門窗關閉嘅情況下, 室內溫度應可保持一段時間, 足夠涼到你起身, 咁又可以慳到電費啦!
